strengthe of men; and it lastethe wel a 4 gret myle. And aftre, is there
zit a lond alle desert, where men may fynde no watre, ne for dyggynge, ne
for non other thing. Wherfore men may not dwellen in that place: so it is
fulle of dragounes, of serpentes and of other venymous bestes, that no man
dar not passe, but zif it be strong wyntre. And that streyt passage, men
clepen in that contree, Clyron. And that is the passage, that the Queen of
Amazoine makethe to ben kept. And thoghe it happene, sum of hem, be
fortune, to gon out; thei conen no maner of langage but Ebrow: so that thei
can not speke to the peple. And zit natheles, men seyn, thei schalle gon
out in the tyme of Antecrist, and that thei schulle maken gret slaughtre of
Cristene men. And therfore alle the Jewes, that dwellen in alle londes,
lernen alle weys to speken Ebrew, in hope that whan the other Jewes schulle
gon out, that thei may undirstonden hire speche, and to leden hem in to
Cristendom, for to destroye the Cristene peple. For the Jewes seyn, that
they knowen wel, be hire Prophecyes, that thei of Caspye schulle been undre
hire subieccioun, als longe as they had ben in subieccioun of hem. And zif
that zee wil wyte, how that thei schulle fynden hire Weye, aftre that I
have herd seye, I schalle telle zou. In the time of Antecrist, a fox
schalle make there his trayne, and mynen an hole, where Kyng Alisandre leet
make the Zates: and so longe he schalle mynen and perce the erthe, till
that he schalle passe thorghe, towardes that folk. And whan thei seen the
fox thei schulle have gret marveylle of him, be cause that thei saughe
never suche a best. For of alle other bestes, thei han enclosed amonges
hem, saf only the fox. And thanne thei schullen chacen him and pursuen him
so streyte, tille that he come to the same place, that he cam fro. And
thanne thei schullen dyggen and mynen so strongly, tille that thei fynden
the zates, that Kyng Alisandre leet make of grete stones and passynge huge,
wel symented and made stronge for the maystrie. And tho zates thei schulle
breken, and so gon out, be fyndynge of that issue.