'Ye--ye insulted me.'

'Insulted ye! Guid kens I didna mean it. What did I say?'

'Oh, dear, I'll never get ower it.'

'Havers! I'll apologize if ye tell me what I said. Dinna greet,
for ony favour. Ye'll ha'e the folk lookin' at us. Listen,
Mary--that's yer name, is't no?'

'It's Maggie, ye impiddent thing!'

'Weel, Maggie, I apologize for whatever I said, whether I said it
or no. I'm no ma usual the nicht, so ye maun try for to excuse me.
I certainly never meant for to hurt yer feelin's.'

She dropped the handkerchief. 'Ha'e ye got a sair heid?'

'Ay--something like that. So let me doon easy.'

She slid her hand under his which was overhanging the division
between the seats.

'I'm sorry I was silly, but I'm that tender-hearted, I was feart ye
was takin' yer fun aff me. I'm awfu' vexed ye've got a sair heid.
I suppose it's the heat. Ony objection to me callin' ye
Macgreegor?'

'That's a' richt,' he replied kindly but uneasily.