The shoemaker looked blank.

'Ye're no gaein' to desert me, are ye?'

'Na, weel I wat!' returned Robert. 'But I want to try her at hame.
I maun get used till her a bittie, ye ken, afore I can du onything
wi' her.'

'I wiss ye had na brought her here ava. What I am to du wantin'
her!'

'What for dinna ye get yer ain back?'

'I haena the siller, man. And, forbye, I doobt I wadna be that sair
content wi' her noo gin I had her. I used to think her gran'. But
I'm clean oot o' conceit o' her. That bonnie leddy's ta'en 't clean
oot o' me.'

'But ye canna hae her aye, ye ken, Sanders. She's no mine. She's
my grannie's, ye ken.'

'What's the use o' her to her? She pits nae vailue upon her. Eh,
man, gin she wad gie her to me, I wad haud her i' the best o' shune
a' the lave o' her days.'

'That wadna be muckle, Sanders, for she hasna had a new pair sin'
ever I mind.'

'But I wad haud Betty in shune as weel.'