'My years are no to fin' faut wi', mem. They're weel eneuch.'

'That's naething to the pint, Betty. What's the laddie aboot?'

'Do ye mean whan he gangs up the stair, mem?'

'Ay. Ye ken weel eneuch what I mean.'

'Weel, mem, I tell ye I dinna ken. An' ye never heard me tell ye a
lee sin' ever I was i' yer service, mem.'

'Na, nae doonricht. Ye gang aboot it an' aboot it, an' at last ye
come sae near leein' that gin ye spak anither word, ye wad be at it;
and it jist fleys (frights) me frae speirin' ae ither question at
ye. An' that's hoo ye win oot o' 't. But noo 'at it's aboot my ain
oye (grandson), I'm no gaein' to tyne (lose) him to save a woman o'
your years, wha oucht to ken better; an sae I'll speir at ye, though
ye suld be driven to lee like Sawtan himsel'.--What's he aboot whan
he gangs up the stair? Noo!'

'Weel, as sure's deith, I dinna ken. Ye drive me to sweirin', mem,
an' no to leein'.'

'I carena. Hae ye no idea aboot it, than, Betty?'

'Weel, mem, I think sometimes he canna be weel, and maun hae a tod
(fox) in 's stamack, or something o' that nater. For what he eats
is awfu'. An' I think whiles he jist gangs up the stair to eat at
's ain wull.'